రంగు పెన్సిళ్ళు

రంగు పెన్సిళ్ళు
నెమలి ఈకలు
ఇంధ్ర ధనస్సు
సంక్రాంతి ముగ్గులు
నా కళ్ళని, నా కలలని
రంగులతో నింపేసాయి

పెన్సిలు ముల్లు విరిగిపోయినప్పుడు
పెన్సిలు అరిగిపోతున్నందుకు బాధ
నెమలి ఈక చిరిగినప్పుడు
నెమలి ఈక పాడైందని బాధ
ఇంధ్ర ధనుస్సు మాయమైనప్పుడు
మళ్ళీ వస్తుందని ఆశ
ఇవే రంగులు, ఆలోచనలు
జీవితంలో తత్వ చింతనకి
అంకురార్పణ చేసాయి

మనసారా నవ్వటం
మరచిపోయినా మనిషి జీవితం
రంగులు పోయిన హరివిల్లవును

కనిపించని రంగుల కోసం
పరితపిస్తున్న హృదయాలెన్నో
రంగు రాళ్ళ లో వెదుక్కుంటున్నారు
రంగు రాళ్ళు ధరిస్తున్నారు
రంగు నీళ్ళు తాగేస్తున్నారు
చివరకి ఏమి చేయాలో తెలియక
రంగు రంగుల బిళ్ళలు మింగేస్తున్నారు

రంగులన్నిటికీ ఆధారం తెలుపని తెలియక
తెల్లని నిజాన్ని తట్టుకోలేక
కళ్ళు మూసుకుంటున్నారు
నల్లని అభద్దాన్ని భరించలేక
కళ్ళు తెరుస్తున్నారు
కళ్ళకు రంగుటద్దాలు పెట్టుకొని
హమ్మయ్య అనుకుంటున్నారు

జీవితంలో రంగులన్నీ
ఇంధ్ర ధనుస్సువలే మాయమవ్వగా
నలుపు తెలుపుల బాటలో
నలుగుతూ నే సాగుతున్నా
చిరునవ్వుల చినుకుల కోసం
ఆనందపు హరివిల్లుల కోసం

-o-
Date: Jul-23-2009
Atlanta, GA, USA

The above two images copied from wikimedia. Thanks to owners for providing them.

http://commons.wikimedia.org/wiki/File:Colouring_pencils.jpg

http://commons.wikimedia.org/wiki/File:Peacock_feathers.jpg